【星級造型師💅🏻一夜變👨🏻🌾漁民 傾盡千萬身家匿西貢秘景養魚🐟 餵魚食肝藥回饋香港】
https://www.facebook.com/watch/?v=1041226096816757&ref=sharing
由一個紫醉金迷、食好著好嘅世界，突然跳到周圍都係烏蠅、日日劏魚嘅世界，好難想像嘅人生劇變…
今年47歲嘅林子龍（Alex）原本係一個造型設計師及化妝師，入行廿幾年，每日出入高級場所，身邊位位非富則貴，就連娛樂活動都係奢侈品，滑水、玩車，高峰期有幾架車、十幾架電單車嘅佢，幾年前，因為一句說話、一個無意間祈嘅願，令佢由一個五光十色嘅地方，放棄昔日高薪厚職，走到香港「天空之城」西貢企嶺下親力親為開魚排，每朝天光就起身餵魚日曬雨淋。
Alex喺西貢企嶺下開嘅「本土養殖」魚排，人手唔多，記者到訪嗰日，親眼見到呢位曾經嘅星級造型師，雙手由幫人修眉化妝變成餵魚、劏魚，大部份工作都由佢親力親為，餵魚、維修魚排、採購魚苗、研發養殖方法，統統由佢一手包辦。
而Alex用有別於傳統漁民方式養魚，以中藥餵魚，為魚護肝、消炎、保健，成功養好嘅魚，隨後運送到工場真空包裝，條條足磅，魚嘅肝藏顏色仲係鮮粉紅色，Alex仲笑住咁話：啲魚可能有營養過我。
傾盡身家咁辛苦去養魚咁癲？Alex話：「我好相信自己，只要攬住一個啱嘅方向，盡你能力做好佢，已經唔需要擔心啲乜，亦都唔到你擔心。」
